என் சமயலறையில்

*பனீர் பட்டர் மசாலா தயாரிக்கும் போது இஞ்சி, வெங்காயம் விழுது சேர்த்து நன்கு வதக்கி, ஒரு ஸ்பூன் தேங்காய் விழுது சேர்த்துக் கிளறினால் சுவை ஹோட்டலை தோற்கடிக்கும்!

*சூப் தயாரிக்கும் போது இரண்டு ஸ்பூன் பார்லி வாட்டர் கலந்தால் தனிச் சுவை... உடலுக்கும் ஆரோக்கியம்!

*பனீரை சமையலில் பயன்படுத்துவதற்கு முன் மிதமான சூடுள்ள எண்ணையில் அரை நிமிட்ம் பொரித்து தண்ணீரில் போட்டு எடுத்து பயன்படுத்தினால் மிருதுவாகவும் புளிப்பில்லாமலும் இருக்கும்.

*வெஜிடபுள் புலாவ் அல்லது ஃபிரைடு ரைஸ் செய்யும் போது ஏலம், பட்டை, கிராம்பு ஆகியவற்றை வறுத்து மிக்ஸியில் பொடித்து தண்ணீரில் சிறிது நேரம் ஊற வைக்கவேண்டும். அந்த நீரை வடி கட்டி புலாவ் அரிசியை வேக வைக்கும் போது ஊற்றினால் புலாவ் மணக்கும் சாப்பிட சுலபமாக இருக்கும்.

*பாலக் கீரையோ, அரைக்கீரையோ எதுவாக இருந்தாலும் சுத்தம் செய்து விட்டு சர்க்கரை போட்டு நீரில் ஊற வைத்து பிறகு சமைத்தால் ருசியாக இருக்கும்.

*பூண்டு, வெங்காயம், மீன் ஆகியவற்றைக் கையாளும் போது கைகளில் இருந்து ஒருவிதமான வாசனை வரும். வேலை முடிந்ததும் கைகளில் சிறிது டுத் பேஸ்ட்டை தடவி தேய்த்துக் கழுவினால் வாடை நீங்கிவிடும்.

*முந்திரிப் பருப்பை வறுக்கும் போது நெய் சுட ஆரம்பித்த உடனேயே பருப்பைப் போட்டு விட வேண்டும். அப்போது தான் உள்ளேயும் வெளியேயும் ஒரே சீராக வறுபடும்.

*பிரெட் டோஸ்ட் செய்யும் போது நெய் ஊற்றினால் தோசைக் கல் தீயும். வெண்ணைய் போட்டால் தீயாது. கமகம வாசனை தூள் பறக்கும்.

*பூரி இடுகிற போது மாவைத் தொட்டு இட்டு எண்ணையில் பொரிப்பது வழக்கம். மாவுத் துகள்கள் எண்ணையில் படிந்து அடியில் கசடு  படிவது தவிர்க்க முடியாமல் போகும். அதைத் தவிர்க்க பூரி இடுகிற மனையிலும், குழவியிலும் சிறிது எண்ணை தடவி விட்டு பிறகு பூரியை இட்டு எண்ணையில் பொரித்தால், எண்ணையில் கசடு சேராமல் அப்படியே பளிச் சென இருக்கும்.

*பக்கோடாவில் வெங்காயத்துக்குப் பதிலாக முட்டைகோஸ் அல்லது கேரட் அல்லது முள்ளங்கியை துருவிச் சேர்க்கலாம். மொறு மொறுப்பாக இருக்கும்.

*உளுந்து வடை மாவு நீர்த்துப் போய் விட்டதா? பாசிப்பாருப்பு மாவையோ, வேர்க்கடலைப் பொடியையோ கொஞ்சம் கலக்கலாம். சுவையும் கூடும்.

*முறுக்கு, தட்டை போன்றவை செய்யும் போது மாவை வெறும் கடாயில் வறுத்து விட்டுப் பயன் படுத்தினால் மொறு மொறுப்பாக இருக்கும். சீக்கிரம் நமத்துப் போகாமலும் இருக்கும்.

*உளுந்து வடைக்கு அறைக்கும் போது அதனுடன் 2-3 அவித்த உருளைக்கிழங்கையும் சேர்த்து அரைக்கவும். அந்த மாவில் தேவையான வெங்காயம், பச்சை மிளகாய், இஞ்சி, கொத்தமல்லித்தழை தேவையான அளவு சேர்த்து வடையாகத் தட்டவும். எண்ணையில் பொறிக்கவும். புதுவிதமான 'கட்லெட் வடை' தயார்.

*2 ஸ்பூன் உளுத்தம் பருப்பை ஊறவைத்து, அரைத்து பஜ்ஜி மாவில் கலந்து செய்தால் புதுச்சுவை கிடைக்கும்.

*பக்கோடா செய்யும் போது, மாவில் சிறிது நெய்யும் உப்பிட்ட தயிரும் கலந்தால் பக்கோடா மொறு மொறுப்பாக இருக்கும்.

*பஜ்ஜிக்கு மாவு கரைக்கும் போது ஒரு டீஸ்பூன் எண்ணையை காய்ச்சி ஊற்றி பிறகு கரைத்தால் பஜ்ஜி அதிகம் எண்ணையை உறிஞ்சாது.

*வடை, பக்கோடவுக்கு சமையல் சோடாவை சேர்க்க சிலர் விரும்ப மாட்டார்கள். அவர்கள் அதற்குப் பதிலாக சிறிது ரவையைக் கலந்து செய்தால் அதே மொறுமொறுப்பு கிடைக்கும்.

*பாதாம், முந்திரி வைத்திருக்கும் டப்பாவில் சில கிராம்புகளைப் போட்டு வைத்தால் எப்போதும் ஃபிரெஷ்ஷாக இருக்கும்.

*இஞ்சி கைவசம் இல்லை என்றால் சுக்கைத் தட்டி சூடான தண்ணீரில் ஊறப் போட்டு அதற்கு பதிலாகப் பயன்படுத்தலாம்.

*விருந்து முடிந்த பிறகு பீடா, வெற்றிலை, சோம்பு ஆகியவற்றைக்குப் பதிலாக வெள்ளரித் துண்டுகளை சாப்பிட தரலாம். சாப்பிட்ட மசாலா வாசனை இருக்காது. புத்துணர்ச்சி பிறக்கும்.

*சன்னா மசாலாவோ, வேறு எந்த சுண்டல் வகையாகவோ இருந்தாலும் அதன் மீது பீட்ரூட், கேரட் துருவலை தூவி சாப்பிட்டால் கூடுதல் சுவை.

*ஜாங்கிரிக்கான மாவை கிரைண்டரில் அரைக்காமல் ஆட்டுரலில் அரைத்தால் மிருதுவாகவும் சுவையாகவும் இருக்கும்.

*ஏலக்காயை சிறிது நேரம் ஃபிரிட்ஜில் வைத்திருந்து பிறகு எடுத்து பொடித்தால் தோல் இல்லாமல் நன்றாகப் பொடிக்க வரும்.

சுண்டைக்காய் விஷமல்ல!

சுண்டைக்காய்

வனப்பகுதிகளில் இயற்கையாகவே வளரும் பல அறிய மூலிகைகள் குறித்து நாம் அதிகம் அறிந்துகொள்ளாததுடன் நாம் உட்கொள்ளும் பல உணவுகளிலும் அதன் முழு பயன்களையும் தெரியாமலே உட்கொள்கிறோம்.

அந்த வகையில் நீலகிரி பந்தலூர் பகுதி வனங்‌களில் அதிகளவில் வளர்ந்துள்ள சுண்டைக்காய் மருத்துவ குணங்களை கொண்டது. எந்த ரசாயன உரங்களோ, மருந்துகளோ தெளிக்காமல் வனப்பகுதிகளில் செடியாக வளரும் சுண்டைக்காய் கத்தரி-கண்டங்கத்தரி தாவர இனத்தை சேர்ந்தது. காய் சிறு கசப்பு சுவையுடையது. இவை வத்தக்குழம்புகளில் அதிகம் சேர்க்கப்படும். புரதம், கால்சியம், இரும்புசாத்து கொண்ட சுண்டைக்காய் ரத்தத்தை சுத்தமாக்கும். 

உடர்சோர்வு நீங்குதல், வயிற்றுப்புண்ணை ஆற்றும் தன்மையும் வயிற்றின் உட்புற சுவர்கள் பலமடையவும் பயன்படுகிறது. பல்வலிக்கும் சிறந்த மருந்தாகும். பந்தலூர் சுற்றுவட்டார பகுதிகளில் காய்ந்து குலுங்கும் சுண்டைக்காய்களை சமவெளிப் பகுதிகளிலிருந்து இப்பகுதி கடைகளுக்கு சாம்பார் பொருட்கள் கொண்டு வரும் பலரும் வத்தல் செய்வதற்காக பறித்து செல்கின்றனர். உள்ளூரில் இதன் மருத்துவ குணம் தெரியாததால் இதனை மக்கள் உதாசீனப் படுத்தி வருகின்றனர்.

குழந்தைகளை தனியறையில் தூங்க வைக்கலாமா?

பிறந்தது முதலே தாயின் அரவணைப்பில் இருப்பதற்கு ஒவ்வொரு குழந்தையும் விரும்புகின்றது. தனது உறக்கமும் தாயுடன் இருக்க விரும்பும் குழந்தைகள் அம்மா தன் அருகில் இல்லை என்பதை ஒரு சின்ன அசைவில் இருந்து கூட தெரிந்து கொண்டு விடுகிறது. தொடக்கம் முதல் தாயுடன் தூங்க விரும்பும் குழந்தைகள் இப்பழக்கத்தை 16,17 வயது வரையில் தொடர விரும்பும் போதுதான் பிரச்சினையாகிறது. இப்படிப்பட்ட ' வளர்ந்த பிள்ளைகள்' எல்லா செயல்பாடுகளிலும் அம்மா பிள்ளைகளாகவே இருந்து  இளம் வயதுக்கே உரிய தங்கள் முடிவெடுக்கும் ஆற்றலை இழந்துவிடுவார்கள் என்று குடும்பநல ஆலோசகர் மகேஷ் கூறுகிறார் மேலும் அவர் கூறியதாவது:

சில குழந்தைகள் தாய்பால் குடித்து வயிறு நிரம்பியதும் உறங்கிவிடுவார்கள். அப்படி தூங்கி ஐந்து நிமிடத்திற்கெல்லாம் ஒரு விரலை எடுத்து வாயில் வைத்து சூப்பிக் கொண்டிருப்பார்கள். இது அன்னிச்சையாக நடந்தாலும், உண்மையில் தாயிடம் பால் குடித்து கொண்டிருப்பதாக அவர்கள் நம்பும் அந்த நம்பிக்கைதான் இப்படி விரலை சப்பச் செய்கிறது. இது அவர்களை தாயின் பாதுகாப்பு வளையத்திற்குள் நிம்மதியாக இருப்பதை உணரவைக்கிறது. இதுவே அவர்களின் மனவளர்ச்சிக்கும் அறிவு மேம்பாட்டுக்கும் ஏதுவாகின்றது.

சின்னக்குழந்தைகளை பெற்றோர் தங்கள் இருவருக்கும் இடையே படுக்க வைப்பது நல்லது. பல பெற்றோர்கள் இருவருமே வேலைக்கு போகிறவர்களாக இருப்பார்கள். இவர்களின் பிள்ளைகள் பகல் நேரத்தில் தாத்தா பாட்டியின் பராமரிப்பிலோ அல்லது வீட்டோடு இருக்கும் வேலைக்கார பெண்ணின் நேரடி பார்வையிலோ தான் இருப்பார்கள். அதே நேரம் இரவு முழுக்க பெற்றோரின் அரவணைப்புக்குள் இருக்கும் வாய்ப்பு கிடைப்பதால் தங்கள் தனியாக இருந்த நேரங்கள் ஈடு செய்யப்பட்டு விட்டதாக திருப்தி கொள்வார்கள்.

2வது குழந்தை பிறக்கும் பொழுது முதல் குழந்தையின் நிலை சொல்லிக்கொள்ளும்படியாக இல்லை. 2வது குழந்தை பிறக்கும் பொழுது தனிமையை உணரத் தொடங்கும் முதல் குழந்தை. 2வது குழந்தையை எதிரியாக பார்க்கத் துவங்கிவிடும். இத்தகைய மனக்கசப்பு முதல் குழந்தைக்கு ஏற்படாமல் பார்த்துக்கொள்ளவேண்டும். ஒரு குழந்தை தாயிடம் படுத்துக்கொண்டால், 2வது குழந்தை தந்தையிடம் படுத்துக்கொள்ள வைக்க வேண்டும். தாயிடம் காட்டும் பாசத்துக்கு இணையாக தந்தையிடம் குழந்தைகள் ஓட்டிக்கொள்ளும்.

ஏழு மற்றும் எட்டு வயதில், குழந்தைகள் சிறுவர்கள் நிலைக்கு வருகிறார்கள். இந்த பருவத்தில் அவர்களுக்கு வீட்டைத்தாண்டி பள்ளி உள்ளிட்ட வெளிஇடங்களில் இருந்தும் நண்பர்கள் கிடைக்கின்றனர். இந்நிலையில், தனியறையில் தூங்கும் அளவிற்கு அவர்களுக்குள் மாற்றம் நேரிடுகிறது. இந்த வயதிலும் பெற்றோருடன் ஒரே அறையில் தான் தூங்குவேன் என்று அடம் பிடிக்கும் சிறுவர்களை நல்ல விதமாய் பெற்றோரே எடுத்து சொல்லி அவர்கள் தனியறையில் தூங்கும் பழக்கத்தை ஏற்படுத்தி விட வேண்டும். திகில் கதைகள் கேட்பது படங்கள் பார்ப்பதன் மூலம் தனியறையில் படுக்க பயப்படலாம்.

இப்படி பயக்கும் குழந்தைகள் பெற்றோர் தூங்கும் அறையிலே தனி கட்டில் போட்டு தூங்க வைக்கலாம். இப்படி ஏற்பாடு செய்தும் தனியாக பயப்படுபவர்களின் அருகில் பெற்றோரில் யாராவது ஒருவர் அவர்கள் தூங்கும் வரை படுத்திருக்கலாம். நாளடைவில் இந்த சிறுவர்கள் தனியாக தூங்க பழக்கப்பட்டு விடுவார்கள்.

ஆரோக்கியத்துக்குத்தான் 'சப்போ(ர்)ட்டா இருக்கே..!

சப்போட்டா

கடவுள் படைத்த இவ்வுலகில் ஒவ்வொன்றும் ஏதேனும் ஒரு காரணத்திற்காகத்தான் படைக்க பட்டிருக்கிறது. அந்த வகையில் மனித வாழ்க்கையும் இயற்கையும் ஒன்றை ஒன்று சார்ந்தேதான் இயங்கி கொண்டிருக்கிறது.

இயற்கைக் கொடுத்த பல அற்புதங்களில் மனித வாழ்க்கைக்கு எப்பொழுதும் 'சப்போர்ட்'டாக விளங்குவதில் ' சப்போட்டா' பழம் முதல் சாய்ஸ் என்றே சொல்லலாம். அப்படி என்னதான் இருக்கிறது எனகேள்வி கேட்பவர்கள் தொடர்ந்து படிக்கலாம். நாம் சுறுசுறுப்பாக நடந்து செல்ல நமக்கு மிகவும் அவசியமாக இருப்பது ஆற்றல். அந்த ஆற்றலை அதிகளவு கொண்டுள்ளது சப்போட்டா பழம்.

ஏனெனில் உடலுக்குத் தேவையான ஆற்றலை வழங்கும் குளுக்கோஸ் அதில் அதிகம் உள்ளது. விளையாட்டு வீரர்கள் தங்களுக்குத் தேவையான அதிக ஆற்றலை பெற இது உகந்தது. வைட்டமின் 'ஏ' மற்றும் 'பி' இதில் அதிகம் காணப்படுவதால் நமது தோலின் அமைப்பு முறையை ஆரோக்கியமாகப் பராமரிக்கிறது. சப்போட்டாவில் உள்ள ஆண்டியாக்ஸிடண்ட்கள், நார்ச்சத்துக்கள் மற்றும் ஊட்டச்சத்துகள் புற்றுநோய்க்கு எதிரான பாதுகாப்பை வழங்குகிறது.            

எலும்பைப் பலப்படுத்தத் தேவையான கால்சியம், பாஸ்பரஸ், இரும்பு சத்துக்களை அதிகளவு கொண்டுள்ள சப்போட்டா பழத்தை, தொடர்ந்து சாப்பிடுவதால் எலும்பு பலப்படுகிறது. சப்போட்டாவிலிருந்து நமது உடலுக்கு 56/100 கிராம் அளவு நார்ச்சத்து கிடைப்பதால் மலச்சிக்கல் போன்ற பிரச்சனையும் வராது. இதயம் சம்பந்தமான கோளாறுகளுக்கு ஏற்றபடி பாதுகாக்கும் தன்மையைச் சப்போட்டா பழம் கொண்டுள்ளது.

சப்போட்டா பழச்சாறுடன் தேயிலை சாறும் சேர்த்து பருகினால் ரத்த பேதி குணமாகும். தூக்கமின்மையால் அவதிபடுபவர்கள் இரவில் படுக்கைக்குப் போகும் முன் ஒரு டம்ளர் சப்போட்டா பழ ஜூஸ் குடித்தால் நிம்மதியான தூக்கத்தை பெறலாம். சப்போட்டா பழத்தைச் சாப்பிட்டுவிட்டு ஒரு தேக்கரண்டி சீரகத்தை நான்கு மென்று விழுங்கினால் போதும் பித்தம் பறந்தே போகும். பித்த மயக்கத்திற்கு இது நல்ல மருந்து.

சப்போட்டா பழத்தைக் கூழக்கி சிறுது சுக்கு சித்தரத்தையைப் பொடித்துப் போட்டுச் சாப்பிடலாம். ஆராய்ச்சியாளர்களின் ஆராய்ச்சிப்படி பார்வையைப் பலப்படுத்துவதோடு முதுமையைத் தள்ளிபோடும் ஆற்றலும் இதில் அதிகம். எனவே தினமும் ஒரு சப்போட்டா பழம் எடுத்துக் கொண்டால்போதும் உங்கள் ஆரோக்கியத்திற்கான ' புல் சப்போர்ட்' டும் சப்போட்டா பழம் வழங்குகிறது.

வைட்டமின் ஏ மற்றும் பி உள்ளதால் உடலில் ஆரோக்கியத்தை பராமரிக்கிறது. சப்போட்டாவில் உள்ள ஆண்டியாக்கிடடண்ட் நார்சத்து மற்றும் ஊட்டசத்துக்கள் புற்றுநோய்க்கு எதிரான பாதுகாப்பை தரும். எலும்பை பலப்படுத்த தேவையான கால்சியம், பாஸ்பரஸ், இரும்புச்சத்து உள்ளதால் எலும்பை பலப்படுத்தும். சப்போட்டா பழத்தை சாப்பிட்டதும் ஒரு தேக்கரண்டி சீர்த்தை நன்கு மென்று விழுங்கினால் பித்த விலகும். விளையாட்டு வீரர்களுக்கு அதிக சக்தி தேவைப்படும் என்பதால் சப்போட்டா பரிந்துரைக்கப்படுகிறது.

காளானின் மருத்துவ குணங்கள்

காளான் மழைக்காலங்‌களில் மட்கிப் போன பொருட்களில் மீது வளரும் ஒரு பூஞ்சை இனம். இவற்றில் இயற்கையாய் வளரும் சில காளான்களில் விஷமுள்ளதும் விஷமற்றதாகவும் உள்ளன. காளான் வளர்ப்பு சிறந்த குடிசைத் தொழிலாக செய்து, வருமானம் ஈட்டி வருகின்றனர். இது மிகுந்த சத்து சுவை உடையதாக உள்ளது. மருத்துவ பயன்களை கொண்டது.

இந்தியாவில் எட்டு வகை காளான்கள் உள்ளன. இவற்றில் மொட்டுக் காளான், சிப்பிக் காளான் மட்டுமே அதிகப் பயன் பாட்டில் உள்ளது. காளான் ரத்தத்தில் கலந்துள்ள அதிகப்படியான கொழுப்பை எடுத்து தேவைப்படும் இடத்துக்கு அனுப்பும் வியத்தகு பணியை காளானில் உள்ள வேதிப்பொருட்கள் செய்கின்றன. இதனால் உடலில் தேவையில்லாத இடத்தில் அதிகப்படியான கொழுப்பு படிவது தடுக்கப்படுகிறது. இதனால் ரத்தம் சுத்தம் செய்யப்பட்டு, இதயம் சீராக இயங்க உதவுகிறது. இதயத்தை காப்பதில் காளானின் பங்கு அதிகம் எனலாம்.

ரத்த அழுத்தத்தின் போது ரத்தத்தில் உள்ள உட்புறம் வெளிப்புறம் செல்களில் பொட்டாசியம், சோடியம் ஆகிய வற்றை அளவு சமமாக இருக்க வேண்டும். அப்பணியை காளானில் உள்ள வேதிப்பொருட்கள் திறம்பட செய்கிறது. மேலும், காளானில் உள்ள தாமிர சத்து ரத்த நாளங்களில் ஏற்படும் பாதிப்பை சீர் படுத்துகிறது. காளான் மூட்டு வாதம் உள்ளவர்களுக்கு சிறந்த மருந்து. மலட்டுதன்மை மற்றும் கருப்பை நோயுள்ள பெண்களுக்கு சிறந்த மருந்து. காளானில் அமினோ அமிலங்கள் உள்ளதால் குழந்தைகளின் உடல் வளர்ச்சிக்கு தேவையான ஊட்டச்சத்து கிடைக்கிறது. ஜீரணம், மலச்சிக்கலை தீர்க்கும் இயல்புடையது. பாலூட்டும் பெண்கள் காளான் உண்பதை தவிர்ப்பது நல்லது.

பழங்களை தேர்வு செய்வது எப்படி?

இன்றைய வேகமான சூழலில் முறையான உணவுப் பொருட்களை சாப்பிடாததால், பல்வேறு சத்துக்குறைபாடு நோய்கள் ஏற்படுகின்றன. காய்கறிகள், பழங்கள், கீரைகள் மற்றும் தானியங்களை சம அளவில் உணவில் சேர்த்து கொள்ள வேண்டும். மாறிவரும் உணவுப் பழக்க வழக்கத்‌தாலும், துரித உணவுகளை உட் கொள்வதாலும், இளைய தலைமுறையினர் மாற்று உணவு கலாச்சார முறைக்கு அடிமையாகி வருகின்றனர்.

இயற்கை உணவுகளை விட்டு நாம் நெடுந்தொலைவு வந்து விட்ட காரணத்தால், நோய் நொடிகள் நம்மை நெருங்கி விட்டன. டப்பா உணவுகள் கமர்சியல் சத்து மாவுகளை தரம் பார்த்து நிறுவனம் பார்த்து வாங்கலாம். ஆனாலும் கம்பு, கேழ்வரகு, சோளம், சாமை, தினை என சிறுதானியங்களில் கிடைக்கும் சத்துக்கு நிகர் இல்லை. நமது முன்னோர்களே அதற்கு தக்க சாட்சி. குறிப்பாக நம்மில் பலர் குறிப்பிட்ட பழங்களை தவிர மற்ற பல வகைகளை சாப்பிடுவதே கிடையது. முப்பது வகையான பழங்கள் சாப்பிடக்கூடியவையாக உள்ளன.

மாம்பழம், பலாப்பழம், வாழைப்பழம், ஆப்பிள், திராட்சை, கொய்யா என குறிப்பிட்ட சில பழங்களை தவிர, மற்ற பழங்களை பெரும்பாலும் சாப்பிட அக்கறை கொள்வதில்லை. ஒவ்வொரு பழங்களும் குறிப்பிட்ட விட்டமின் சத்துபொருட்களை உடலுக்கு தருகின்றன. மலிவு விலையில் கிடைக்ககூடிய நெல்லிக்காய், சப்போட்டா, முந்திரி பழம், ஈச்சம் பழம், பேரிச்சம் பழம், வெள்ளரி போன்றவைகளை சாப்பிடுவோர் மிகக்குறைவே. இதனால் விட்டமின் குறைபாடு ஏற்பட வாய்ப்புள்ளது.

குறிப்பிட்ட காலநிலைகளில் கிடைக்கும் பழங்கள் மற்றும் காய்கறிகள் அதிகளவில் சாப்பிடுவதும் தவறு. வெயில் காலத்தில் மாம்பழம் கிடைக்கிறது என்பதற்காக அதிகளவில் சாப்பிட்டால் சூடு பிடிக்கும். இதற்கு இயற்கை தந்த மாற்று பழம் தான் வெள்ளரி. இதில் அதிகளவில் நீர்ச்சத்து இருப்பதால், கோடை தாகத்திற்கு தண்ணீருக்கு மாற்று உணவாக கருதப் படுகிறது. பொதுவாக பழங்கள் வாங்க கடைக்கு செல்லும் போது பளபளப்பாக மீனுக்கும் தன்மையுடன் இருக்கும் பழங்களை தேர்ந்தெடுக்க கூடாது.

பெரும்பாலான பழங்கள் விரைவில் காய் நிலையில் பழுக்க வேண்டும் என்பதற்காக, ரசாயன பொருட்கள் கலக்கப்படுகின்றன. இதனால் மினுக்கும் தன்மையுடைய பழங்களை தவிர்த்தல் நல்லது. பேரீச்சம் பழம் வாங்கும் போது காய்ந்த கருப்பு நிறமுடையவைகளை தெளிவு செய்ய வேண்டும். குறைந்த விலையில் மலிவாக கிடைக்கிறது என்பதற்காக எண்ணை தடவிய பேரிச்சம் பழங்களை வாங்கி சாப்பிட்டால் வயிற்று பிரச்சனைகளுக்கு ஆளாக நேரிடலாம்.   

மாதுளம், ஆரஞ்சு, சாத்துக்குடி போன்ற பழங்களை வாங்கும் போது, நுகர்ந்து பார்த்து வாங்க வேண்டும். மணத்தை வைத்து இப்பழங்கள் சாப்பிட தகுதியானவை என்பதை தெரிந்து கொள்ளலாம். வெளிஇடங்களில் பழ ரசம் சாப்பிடுவதை தவிர்த்தல் நல்லது. பழரசம் செய்து சாப்பிடுவதை காட்டிலும் பழங்களை அப்படியே சாப்பிடுவது நல்லது. இதன் மூலம் ஈறுகள் வலுவடைவதோடு அல்லாமல் வாய் புத்துணர்ச்சி அடையும். இனி பழங்கள் வாங்குவதற்கு முன் பலமுறை யோசித்து தெளிவு செய்யுங்கள்.

நலம் பல தரும் 'நந்தியா வட்டை'

மூலிகை தாவரங்களில் இருக்கும் மகத்துவம்அறிந்தே, சித்தர்கள் பல மருத்துவ வித்தைகளை கற்று தேர்ந்தனர். விஷயம் தெரிந்தவர்கள் நமது வீடுகளிலேயே மூலிகை செடிகளை வளர்த்து பயனடைகின்றனர். தோட்டங்களிலும், வெளியோரமாகவும் நாம் தினமும் பார்க்கும் நந்தியா வட்டையை அசட்டையாக பார்ப்பதை விடுங்கள்.

அதன் மகத்துவம் தெரிந்தால் ஆச்சரியம் தான் மிஞ்சும். பல்வேறு மருத்துவ பயன்களை கொண்டுள்ளது என்பதை நம்மில் பலருக்கு தெரியவில்லை என்பதே உண்மை. இலை, மலர், வேர், வேர்பாட்டை, கட்டை, போன்றவை மருத்துவ பயன் கொண்டவை. கண்நோய், பல்நோய், போக்க ஆயுர்வேத மருத்துவத்தில் நந்தியா வட்டை அதிக அளவில் பயன்படுகிறது.

செயல் திறன் மிக வேதிப்பொருட்கள்:

அமினோ அமிலங்கள், கரிம அமிலங்கள் அதிக அளவில் காணப்படுகின்றன. சிட்ரிக், ஒலிம்பிக் அமிலங்கள், டேபர்னோடோன்டைன், பாக்டீரியா எதிர்ப்பு அமிலம் ஆகியவை இதில் உள்ளன.

பார்வை கோளாறு குணமடையும்:

இலைகளில் பால் சாறு காயங்களில் மேல் பூசப்படுவதால் வீக்கம் குறையும். கண் நோயிலும் உதவுகிறது. நந்தியா வட்டைப்புவும், கண்களில் விழும் பூ மறைய உதவும். நந்தியா வட்டப் பூவானது நேந்திராகாசம், படலம், லிங்க நாச தோஷங்கள், சிரஸ்தாப ரோகம், ஆகியவற்றை கொடுக்கும். இதில் ஒற்றைப் பூ இரட்டைப் பூ என்கிற இரண்டு இனமுண்டு; இரண்டும் ஒரே குணமுடையவை. கண்களில் உண்டான கொதிப்புக்கு, இதை கண்களை முடி கொண்டு மிருதுவாக ஒற்றடம் கொடுக்க கண் எரிச்சல் நீங்கி குளிர்ச்சியாகும்.

மலர்களின் சாறு எண்ணைய் கலந்து பயன்படுத்தும் போது எரிச்சல் உணர்வை மட்டுப்படுத்தும். இதன் பூக்கள் வாசனையூட்டும் பொருளாக பயன்படுகின்றது. இதிலிருந்து அழியாத மை தயார் செய்கிறார்கள். நந்தியா வட்டப் பூ 50 கிராம், ஒரு பாட்டிலில் போட்டு நல்லெண்ணையில் ஊறவைத்து 20 நாள்கள் வெயிலில் வைத்து வடிகட்டி ஓரிரு துளி காலை, மாலை கண்களில் விட்டு வர பூ, சதை வளர்ச்சி, பல விதமான கண் படலங்கள், பார்வை மந்தம் நீங்கும்.

பல் வலி நீங்கும்:

நந்தியா வட்டை வேரை கசாயமிட்டுக் குடிக்க வயிற்று போக்கு, வயிற்று கடுப்பு நீங்கும்: கண் நோய் மற்றும் தோல் நோய்களை குணப்படுத்தும். வேர்பாட்டை வயிற்று பூச்சிகளுக்கு எதிரானது. வேர் கசப்பானது, பல் வலி போக்கும். வலி நீக்கும். கட்டை குளுமை தருவது வேரை வாயிலிட்டு மென்று துப்பிவிட பல் வலி நீங்கும்.