கடைச்சரக்குகளின் மருத்துவ குணங்கள்!

சுக்கு:-

 
தமிழ்நாட்டில் மஞ்சளுக்கு அடுத்து சுக்கு இரண்டாவது மருந்தெனக் கூறலாம். 'சுக்குக்கு மிஞ்சின மருந்தில்லை. சுப்பிரமணியருக்கு மிஞ்சின தெய்வமில்லை' என்று ஒரு பழமொழியே உண்டு. பசிமந்தம், நெஞ்செரிச்சல், புளியேப்பம், வாய்வு வலி, வயுற்று உப்புசம், ஒற்றை தலைவலி, வீக்கங்கள் முதலிய நோய்களுக்கு சுக்கு பலவிதங்களில் பயன்படுகிறது. பச்சை சுக்கைப் பொடித்து சம அளவு பனைவெல்லம் கலந்து சாப்பிட நீர் பேதி கட்டுப்பாடும். சுட்ட சூக்கைப் பொடித்‌து நெய் சிறிதளவு சேர்த்துப் பிசைந்து சாப்பிட்டு வர வயுற்று உப்புசம்- மலக்கட்டு நீங்கும்.

திப்பிலி:-

இவற்றில் அரிசி திப்பிலி, யானை திப்பிலி என இருவகைப்படும். மேகக் கட்டிகள் கோழை போன்றவற்றையும் வயிற்று உப்புசத்தையும் நீக்கக் கூடியது,

கருஞ்சீரகம்:-

 
சூதகக் கட்டை நிக்கும் தன்மை கொண்டது. வயதுக்கு வராத பெண்களுக்கு கருஞ்சீரகம், மாவிலைப்பட்டை, சிறிதளவு எடுத்து இரண்டையும் நன்றாக அரைத்து சிறிது வெல்லம் சேர்த்து சிறு உருண்டை மூன்று வேளை கொடுக்க, பலன் காணலாம். தலையில் ஏற்படும் சொறி, சிரங்குகள், மூக்கிலிருந்து கட்டி கட்டியாக சளி வருதல், கண் சம்பந்தமான நோய்களை விரட்டக் கூடியது கருஞ்சீரகம்.

வசம்பு:-

இது குழந்தைகளுக்கு ஏற்ற சிறந்த சஞ்சீவி எனலாம். பேதியானால் வசம்புவைக் கருக்கி தேனில் குழைத்து சிறிது கொடுக்கலாம். குழந்தைகளின் சூட்டிற்கு கருகிய வசம்பை வெந்நீரில் குழைத்து தொப்புளைச் சுற்றி தடவலாம். அதிக அளவு வசம்பை குழந்தைகளுக்கு கொடுக்கக் கூடாது. வசம்பை குழந்தையுள்ளவர்கள் கைவசம் வாங்கி வைத்திருப்பது நல்லது.

அதிமதுரம்:-

 
முத்தோஷங்களால் ஏற்படும் கபக் கட்டுகளை நீக்கும். கண் நோய், ஆசனவலி, ஜீரம் போன்றவற்றைக் கட்டுப்படுத்தும். கண்களுக்குக் குளிர்ச்சியைத் தரும். நாவறட்சி, சிறுநீர் எரிச்சல், மதிமந்தம் போன்றவற்றை நீக்கும் குணம் கொண்டது. அதிமதுரத்தை சிறிதளவு நாவில் அடக்கி கொண்டால் பற்கள் உறுதி பெரும். நாவறட்சி தீரும். சூட்டை தணிக்கும்.

கிராம்பு:-
 
இது பல்வலியைப் போக்கக் கூடியது சிறந்த மருந்தாகும். கிராம்பையும், உப்பையும் பொடித்‌து பல்வலி, இருவலியுள்ள இடங்களில் வைத்து அழுத்த உடனடியாகக் குணம் காணலாம். கபக்கட்டு, குக்கிருமலைப் போக்கும் சக்தி கொண்டது. உணவுக்கு சுவை கூட்டும். ஜீரண சக்தி உண்டாகும்.

கடுக்காய்:-
 
இதில் கடுக்காயின் பிரிவு ஏழு என்று வைத்திய சாஸ்திரத்தில் சொல்லப்பட்டுள்ளது. சூரத்துக் கடுக்காய் என்னும் சிவப்புக் கடுக்காய் சிறந்த பலன் அளிக்கக் கூடியது. ஈளை, இருமல், கபக் கட்டுகளை நீக்கக் கூடியது. குடலை சுத்தி செய்து மலக்கட்டைப் போக்கும். இரணங்களை ஆற்றக்கூடிய தன்மை கொண்டது. படைகளுக்கு கடுக்காயைத் தாய்ப்பாலில் உரசிப் போட்டு வர படை விரைவில் நீங்கும்.

ஜாதிக்காய்:-
 
மூச்சடைப்பு, தலைவலி, அதிக தாது வெளிப்படுதல் போன்றவற்றைக் குணப்படுத்தும். இருமல், உடல் சூட்டைத் தணிக்கும்.

அடிக்கடி நெஞ்சு எரிச்சல் ஏற்படுகிறதா?

*முதலில் உணவில் காரத்தைக் குறைத்துக் கொள்ளுங்கள்.

*கறிமணப் பொருட்கள் கலந்து உணவைத் தவிருங்கள்.

*அளவிற்கு அதிகமாக உணவு உட்கொள்ளாதீர்கள்.

*எந்தெந்த உணவு அயிட்டங்கள் எடுத்தல் உங்களுக்கு நெஞ்சு எரிச்சல் ஏற்படுகிறதோ அதை கவனித்து வந்து தவிர்த்துவிடுங்கள்.

*புரதம் மிகுந்த உணவு எடுங்கள்.

கொழுப்புச் சத்தைக் குறைத்துக் கொள்ளுங்கள்.

*படுக்கைக்குப் போவதற்கு இரண்டு மூன்று மணி நேரத்திற்கு முன்பே ஆகாரத்தை எடுத்துக் கொண்டு விடுங்கள்.

*மதியச் சாப்பாட்டுக்குப்பின் சற்று கண்ணயர நினைத்தால் தூங்குங்கள்.

*இரவு தூக்கத்தின்போது கட்டிலின் தலைப்பாகம் உயரமாக இருக்கட்டும். கட்டிலின் தலைப்பகுதிக் கால்களுக்கு மரக்கட்டையையோ செங்கல்லையோ அண்டை கொடுத்து உயரமாக்கிக் கொள்ளுங்கள்.

-இந்த நெஞ்சு எரிச்சல் தடுப்பு முறைகளைப் பின்பற்றி வாருங்கள் நிவாரணம் கிடைக்கும்.

என் சமயலறையில்

*பனீர் பட்டர் மசாலா தயாரிக்கும் போது இஞ்சி, வெங்காயம் விழுது சேர்த்து நன்கு வதக்கி, ஒரு ஸ்பூன் தேங்காய் விழுது சேர்த்துக் கிளறினால் சுவை ஹோட்டலை தோற்கடிக்கும்!

*சூப் தயாரிக்கும் போது இரண்டு ஸ்பூன் பார்லி வாட்டர் கலந்தால் தனிச் சுவை... உடலுக்கும் ஆரோக்கியம்!

*பனீரை சமையலில் பயன்படுத்துவதற்கு முன் மிதமான சூடுள்ள எண்ணையில் அரை நிமிட்ம் பொரித்து தண்ணீரில் போட்டு எடுத்து பயன்படுத்தினால் மிருதுவாகவும் புளிப்பில்லாமலும் இருக்கும்.

*வெஜிடபுள் புலாவ் அல்லது ஃபிரைடு ரைஸ் செய்யும் போது ஏலம், பட்டை, கிராம்பு ஆகியவற்றை வறுத்து மிக்ஸியில் பொடித்து தண்ணீரில் சிறிது நேரம் ஊற வைக்கவேண்டும். அந்த நீரை வடி கட்டி புலாவ் அரிசியை வேக வைக்கும் போது ஊற்றினால் புலாவ் மணக்கும் சாப்பிட சுலபமாக இருக்கும்.

*பாலக் கீரையோ, அரைக்கீரையோ எதுவாக இருந்தாலும் சுத்தம் செய்து விட்டு சர்க்கரை போட்டு நீரில் ஊற வைத்து பிறகு சமைத்தால் ருசியாக இருக்கும்.

*பூண்டு, வெங்காயம், மீன் ஆகியவற்றைக் கையாளும் போது கைகளில் இருந்து ஒருவிதமான வாசனை வரும். வேலை முடிந்ததும் கைகளில் சிறிது டுத் பேஸ்ட்டை தடவி தேய்த்துக் கழுவினால் வாடை நீங்கிவிடும்.

*முந்திரிப் பருப்பை வறுக்கும் போது நெய் சுட ஆரம்பித்த உடனேயே பருப்பைப் போட்டு விட வேண்டும். அப்போது தான் உள்ளேயும் வெளியேயும் ஒரே சீராக வறுபடும்.

*பிரெட் டோஸ்ட் செய்யும் போது நெய் ஊற்றினால் தோசைக் கல் தீயும். வெண்ணைய் போட்டால் தீயாது. கமகம வாசனை தூள் பறக்கும்.

*பூரி இடுகிற போது மாவைத் தொட்டு இட்டு எண்ணையில் பொரிப்பது வழக்கம். மாவுத் துகள்கள் எண்ணையில் படிந்து அடியில் கசடு  படிவது தவிர்க்க முடியாமல் போகும். அதைத் தவிர்க்க பூரி இடுகிற மனையிலும், குழவியிலும் சிறிது எண்ணை தடவி விட்டு பிறகு பூரியை இட்டு எண்ணையில் பொரித்தால், எண்ணையில் கசடு சேராமல் அப்படியே பளிச் சென இருக்கும்.

*பக்கோடாவில் வெங்காயத்துக்குப் பதிலாக முட்டைகோஸ் அல்லது கேரட் அல்லது முள்ளங்கியை துருவிச் சேர்க்கலாம். மொறு மொறுப்பாக இருக்கும்.

*உளுந்து வடை மாவு நீர்த்துப் போய் விட்டதா? பாசிப்பாருப்பு மாவையோ, வேர்க்கடலைப் பொடியையோ கொஞ்சம் கலக்கலாம். சுவையும் கூடும்.

*முறுக்கு, தட்டை போன்றவை செய்யும் போது மாவை வெறும் கடாயில் வறுத்து விட்டுப் பயன் படுத்தினால் மொறு மொறுப்பாக இருக்கும். சீக்கிரம் நமத்துப் போகாமலும் இருக்கும்.

*உளுந்து வடைக்கு அறைக்கும் போது அதனுடன் 2-3 அவித்த உருளைக்கிழங்கையும் சேர்த்து அரைக்கவும். அந்த மாவில் தேவையான வெங்காயம், பச்சை மிளகாய், இஞ்சி, கொத்தமல்லித்தழை தேவையான அளவு சேர்த்து வடையாகத் தட்டவும். எண்ணையில் பொறிக்கவும். புதுவிதமான 'கட்லெட் வடை' தயார்.

*2 ஸ்பூன் உளுத்தம் பருப்பை ஊறவைத்து, அரைத்து பஜ்ஜி மாவில் கலந்து செய்தால் புதுச்சுவை கிடைக்கும்.

*பக்கோடா செய்யும் போது, மாவில் சிறிது நெய்யும் உப்பிட்ட தயிரும் கலந்தால் பக்கோடா மொறு மொறுப்பாக இருக்கும்.

*பஜ்ஜிக்கு மாவு கரைக்கும் போது ஒரு டீஸ்பூன் எண்ணையை காய்ச்சி ஊற்றி பிறகு கரைத்தால் பஜ்ஜி அதிகம் எண்ணையை உறிஞ்சாது.

*வடை, பக்கோடவுக்கு சமையல் சோடாவை சேர்க்க சிலர் விரும்ப மாட்டார்கள். அவர்கள் அதற்குப் பதிலாக சிறிது ரவையைக் கலந்து செய்தால் அதே மொறுமொறுப்பு கிடைக்கும்.

*பாதாம், முந்திரி வைத்திருக்கும் டப்பாவில் சில கிராம்புகளைப் போட்டு வைத்தால் எப்போதும் ஃபிரெஷ்ஷாக இருக்கும்.

*இஞ்சி கைவசம் இல்லை என்றால் சுக்கைத் தட்டி சூடான தண்ணீரில் ஊறப் போட்டு அதற்கு பதிலாகப் பயன்படுத்தலாம்.

*விருந்து முடிந்த பிறகு பீடா, வெற்றிலை, சோம்பு ஆகியவற்றைக்குப் பதிலாக வெள்ளரித் துண்டுகளை சாப்பிட தரலாம். சாப்பிட்ட மசாலா வாசனை இருக்காது. புத்துணர்ச்சி பிறக்கும்.

*சன்னா மசாலாவோ, வேறு எந்த சுண்டல் வகையாகவோ இருந்தாலும் அதன் மீது பீட்ரூட், கேரட் துருவலை தூவி சாப்பிட்டால் கூடுதல் சுவை.

*ஜாங்கிரிக்கான மாவை கிரைண்டரில் அரைக்காமல் ஆட்டுரலில் அரைத்தால் மிருதுவாகவும் சுவையாகவும் இருக்கும்.

*ஏலக்காயை சிறிது நேரம் ஃபிரிட்ஜில் வைத்திருந்து பிறகு எடுத்து பொடித்தால் தோல் இல்லாமல் நன்றாகப் பொடிக்க வரும்.

சுண்டைக்காய் விஷமல்ல!

சுண்டைக்காய்

வனப்பகுதிகளில் இயற்கையாகவே வளரும் பல அறிய மூலிகைகள் குறித்து நாம் அதிகம் அறிந்துகொள்ளாததுடன் நாம் உட்கொள்ளும் பல உணவுகளிலும் அதன் முழு பயன்களையும் தெரியாமலே உட்கொள்கிறோம்.

அந்த வகையில் நீலகிரி பந்தலூர் பகுதி வனங்‌களில் அதிகளவில் வளர்ந்துள்ள சுண்டைக்காய் மருத்துவ குணங்களை கொண்டது. எந்த ரசாயன உரங்களோ, மருந்துகளோ தெளிக்காமல் வனப்பகுதிகளில் செடியாக வளரும் சுண்டைக்காய் கத்தரி-கண்டங்கத்தரி தாவர இனத்தை சேர்ந்தது. காய் சிறு கசப்பு சுவையுடையது. இவை வத்தக்குழம்புகளில் அதிகம் சேர்க்கப்படும். புரதம், கால்சியம், இரும்புசாத்து கொண்ட சுண்டைக்காய் ரத்தத்தை சுத்தமாக்கும். 

உடர்சோர்வு நீங்குதல், வயிற்றுப்புண்ணை ஆற்றும் தன்மையும் வயிற்றின் உட்புற சுவர்கள் பலமடையவும் பயன்படுகிறது. பல்வலிக்கும் சிறந்த மருந்தாகும். பந்தலூர் சுற்றுவட்டார பகுதிகளில் காய்ந்து குலுங்கும் சுண்டைக்காய்களை சமவெளிப் பகுதிகளிலிருந்து இப்பகுதி கடைகளுக்கு சாம்பார் பொருட்கள் கொண்டு வரும் பலரும் வத்தல் செய்வதற்காக பறித்து செல்கின்றனர். உள்ளூரில் இதன் மருத்துவ குணம் தெரியாததால் இதனை மக்கள் உதாசீனப் படுத்தி வருகின்றனர்.

குழந்தைகளை தனியறையில் தூங்க வைக்கலாமா?

பிறந்தது முதலே தாயின் அரவணைப்பில் இருப்பதற்கு ஒவ்வொரு குழந்தையும் விரும்புகின்றது. தனது உறக்கமும் தாயுடன் இருக்க விரும்பும் குழந்தைகள் அம்மா தன் அருகில் இல்லை என்பதை ஒரு சின்ன அசைவில் இருந்து கூட தெரிந்து கொண்டு விடுகிறது. தொடக்கம் முதல் தாயுடன் தூங்க விரும்பும் குழந்தைகள் இப்பழக்கத்தை 16,17 வயது வரையில் தொடர விரும்பும் போதுதான் பிரச்சினையாகிறது. இப்படிப்பட்ட ' வளர்ந்த பிள்ளைகள்' எல்லா செயல்பாடுகளிலும் அம்மா பிள்ளைகளாகவே இருந்து  இளம் வயதுக்கே உரிய தங்கள் முடிவெடுக்கும் ஆற்றலை இழந்துவிடுவார்கள் என்று குடும்பநல ஆலோசகர் மகேஷ் கூறுகிறார் மேலும் அவர் கூறியதாவது:

சில குழந்தைகள் தாய்பால் குடித்து வயிறு நிரம்பியதும் உறங்கிவிடுவார்கள். அப்படி தூங்கி ஐந்து நிமிடத்திற்கெல்லாம் ஒரு விரலை எடுத்து வாயில் வைத்து சூப்பிக் கொண்டிருப்பார்கள். இது அன்னிச்சையாக நடந்தாலும், உண்மையில் தாயிடம் பால் குடித்து கொண்டிருப்பதாக அவர்கள் நம்பும் அந்த நம்பிக்கைதான் இப்படி விரலை சப்பச் செய்கிறது. இது அவர்களை தாயின் பாதுகாப்பு வளையத்திற்குள் நிம்மதியாக இருப்பதை உணரவைக்கிறது. இதுவே அவர்களின் மனவளர்ச்சிக்கும் அறிவு மேம்பாட்டுக்கும் ஏதுவாகின்றது.

சின்னக்குழந்தைகளை பெற்றோர் தங்கள் இருவருக்கும் இடையே படுக்க வைப்பது நல்லது. பல பெற்றோர்கள் இருவருமே வேலைக்கு போகிறவர்களாக இருப்பார்கள். இவர்களின் பிள்ளைகள் பகல் நேரத்தில் தாத்தா பாட்டியின் பராமரிப்பிலோ அல்லது வீட்டோடு இருக்கும் வேலைக்கார பெண்ணின் நேரடி பார்வையிலோ தான் இருப்பார்கள். அதே நேரம் இரவு முழுக்க பெற்றோரின் அரவணைப்புக்குள் இருக்கும் வாய்ப்பு கிடைப்பதால் தங்கள் தனியாக இருந்த நேரங்கள் ஈடு செய்யப்பட்டு விட்டதாக திருப்தி கொள்வார்கள்.

2வது குழந்தை பிறக்கும் பொழுது முதல் குழந்தையின் நிலை சொல்லிக்கொள்ளும்படியாக இல்லை. 2வது குழந்தை பிறக்கும் பொழுது தனிமையை உணரத் தொடங்கும் முதல் குழந்தை. 2வது குழந்தையை எதிரியாக பார்க்கத் துவங்கிவிடும். இத்தகைய மனக்கசப்பு முதல் குழந்தைக்கு ஏற்படாமல் பார்த்துக்கொள்ளவேண்டும். ஒரு குழந்தை தாயிடம் படுத்துக்கொண்டால், 2வது குழந்தை தந்தையிடம் படுத்துக்கொள்ள வைக்க வேண்டும். தாயிடம் காட்டும் பாசத்துக்கு இணையாக தந்தையிடம் குழந்தைகள் ஓட்டிக்கொள்ளும்.

ஏழு மற்றும் எட்டு வயதில், குழந்தைகள் சிறுவர்கள் நிலைக்கு வருகிறார்கள். இந்த பருவத்தில் அவர்களுக்கு வீட்டைத்தாண்டி பள்ளி உள்ளிட்ட வெளிஇடங்களில் இருந்தும் நண்பர்கள் கிடைக்கின்றனர். இந்நிலையில், தனியறையில் தூங்கும் அளவிற்கு அவர்களுக்குள் மாற்றம் நேரிடுகிறது. இந்த வயதிலும் பெற்றோருடன் ஒரே அறையில் தான் தூங்குவேன் என்று அடம் பிடிக்கும் சிறுவர்களை நல்ல விதமாய் பெற்றோரே எடுத்து சொல்லி அவர்கள் தனியறையில் தூங்கும் பழக்கத்தை ஏற்படுத்தி விட வேண்டும். திகில் கதைகள் கேட்பது படங்கள் பார்ப்பதன் மூலம் தனியறையில் படுக்க பயப்படலாம்.

இப்படி பயக்கும் குழந்தைகள் பெற்றோர் தூங்கும் அறையிலே தனி கட்டில் போட்டு தூங்க வைக்கலாம். இப்படி ஏற்பாடு செய்தும் தனியாக பயப்படுபவர்களின் அருகில் பெற்றோரில் யாராவது ஒருவர் அவர்கள் தூங்கும் வரை படுத்திருக்கலாம். நாளடைவில் இந்த சிறுவர்கள் தனியாக தூங்க பழக்கப்பட்டு விடுவார்கள்.