டீத்தூளில் பூச்சிக்கொல்லி மருந்து: கிட்னியை பாதிக்கும் பயங்கரம்!

டீத்தூளில் பூச்சிக்கொல்லி மருந்து: கிட்னியை பாதிக்கும் பயங்கரம்! 

‘‘இப்படியொரு ஆய்வு முடிவை நாங்களே எதிர்பார்க்கவில்லை. இந்திய தேயிலைகளில் கலந்திருக்கும் விஷம், பூச்சிக் கொல்லிகள் மூலம் வந்தது. லட்சக்கணக்கான தேயிலைத் தொழிலாளர்கள் மட்டுமல்லாமல், கோடிக்கணக்கான அப்பாவி மக்களும் இந்த டீத்தூளால் பாதிக்கப்படுவார்கள்’’ என வருத்தத்தோடு பேசுகிறார் ‘கிரீன்பீஸ்’ அமைப்பைச் சேர்ந்த அஸ்வினி. உலகளாவிய இந்தச் சுற்றுச்சூழல் அமைப்பின் இந்தியக் கிளையில் பணியாற்றும் அஸ்வினி, இந்தத் தேயிலை ஆய்வுக் குழுவில் ஒருவரும் கூட!

‘‘இந்தியாவின் டீ தொழில் 175 வருட கால பாரம்பரியம் மிக்கது. இங்கு சுமார் 9.8 லட்ச ஹெக்டேர் நிலத்தில் டீ பயிரிடப்படுகிறது. தமிழ்நாடு உள்ளிட்ட பல மாநிலங்களில் டீ விளைந்தாலும், முக்கால் வாசி உற்பத்தி அசாம், மேகாலயா உள்ளிட்ட இந்தியாவின் வட கிழக்கு மாநிலங்களில்தான். இங்கேயும் சின்னச் சின்ன தேயிலை விவசாயிகள் என்று பார்த்தால் அவர்கள் வெறும் 26 சதவீதம்தான் இருக்கிறார்கள்.

மற்றபடி பெரும் நிறுவனங்கள்தான் தேயிலை விவசாயத்தில் கோலோச்சியிருக்கின்றன. அப்படிப்பட்ட நிறுவனங்களின் மிகப் பிரபலமான 49 பிராண்டுகளைத் தேர்ந்தெடுத்து நாங்கள் ஆய்வு செய்தோம்.

அசபேட், அசடேமிப்ரிட், ஆந்த்ராக்யுனான், க்ளோதி யானிடின், சைபர்மெத்ரின் போன்ற இருபதுக்கும் மேற்பட்ட பூச்சிக்கொல்லிகள் அந்த புகழ்பெற்ற பிராண்ட் டீத்தூள்களில் கலந்திருப்பது ஆய்வில் தெரிய வந்தது. இவையெல்லாம் ஒருபோதும் தேயிலையில் பயன்படுத்தவே கூடாது என இந்திய அரசால் தடை செய்யப்பட்ட பூச்சிக்கொல்லிகள்!’’ என அதிர வைக்கும் அஸ்வினி, தடையை மீறி இந்தப் பூச்சிக்கொல்லிகள் பயன்படுத் தப்படுவது எதனால் என்பதையும் விளக்குகிறார்...

‘‘இந்தியாவில் பூச்சிக்கொல்லிகள் போன்ற ரசாயனங்களைப் பதிவு செய்வதற்கென்றே மத்திய அரசின் அமைப்பு ஒன்று இருக்கிறது. இதை சி.ஐ.பி.ஆர்.சி என்பார்கள். இதில் இதுவரை 248 வகையான பூச்சிக்கொல்லிகள் பதிவு செய்யப்பட்டுள்ளதாகத் தெரிகிறது. அதில் 24 முதல் 34 வகையான பூச்சிக்கொல்லிகளைத்தான் டீக்களில் பயன்படுத்த வேண்டும் என அனுமதி தரப்பட்டுள்ளது.

இந்த அமைப்பு தவிர தேயிலை குறித்த விவகாரங்களுக்காகவே அரசு சார்பாக ‘டீ போர்டு’ என்ற அமைப்பும் இயங்குகிறது. இந்த போர்டும் தேயிலையில் என்னென்ன ரசாயனப் பூச்சிக்கொல்லிகளைப் பயன்படுத்தலாம் என ஒரு லிஸ்ட்டைச் சொல்கிறது. டீயில் நாம் எடுத்துக்கொள்வது இலையைத்தான். தெளிக்கும் பூச்சிக்கொல்லிகள் இலையிலேயே தங்கிவிடும் என்பதால்தான் இப்படிக் கட்டுப்பாடுகள்.

இந்த சி.ஐ.பி.ஆர்.சி மற்றும் டீ போர்டின் கட்டுப்பாடுகள் ஒருபுறம் இருந்தாலும், ஒவ்வொரு மாநிலமும் அங்கிருக்கும் விவசாயப் பல்கலைக்கழகங்களின் ஆய்வு வழிகாட்டுதலின் பேரில்தான் பூச்சிக்கொல்லிகளை பயன்படுத்த அனுமதிக்கும். இப்படிப் பார்த்தால் ஒரு டீ விவசாயி இந்த மூன்று அமைப்புகளில் யார் சொல்வதைப் பின்பற்றுவது என்ற குழப்பம் வந்துவிடுகிறது. இந்தக் குழப்பத்தை சாதகமாக்கிக் கொண்டுதான் எல்லா பூச்சிக் கொல்லிகளையும் வரைமுறை இன்றி பயன்படுத்துகிறார்கள்.

 அது மட்டுமின்றி, தடை செய்யப்பட்ட பூச்சிக் கொல்லிகளை அனுமதிக்கப்பட்ட மருந்துகளோடு கலந்து காக்டெயில் போலாக்கி தேயிலைச் செடிகளில் பயன்படுத்தும் போக்கும் அதிகரித்திருக்கிறது. டீயில் பயன்படுத்தக்கூடிய பூச்சிக்கொல்லிகளைப் பற்றி தெளிவான கொள்கை ஒன்றை அரசு வகுக்க வேண்டும் என்பதையே இந்தக் குளறுபடிகள் காட்டுகின்றன’’ என்கிறார் அவர்.

இப்படியே இந்திய டீக்களில் பூச்சிக்கொல்லி மருந்துகள் கலப்பது தொடர்கதையானால், மக்களுக்கு என்னென்ன பாதிப்புகள் வரும்? அதையும் அஸ்வினியே பட்டியலிட்டார்...‘‘இதெல்லாம் ஸ்லோ பாய்ஸன் போன்றவை. உடனடியாக பாதிப்புகள் தெரியாது. ஆனால், பாதிப்பு ஏற்படுவது உறுதி. உதாரணமாக வயிற்றுவலியில் துவங்கி தோல் நோய்கள், கிட்னி பாதிப்பு, உடல் வளர்ச்சிக் குறைபாடு, கல்லீரல் பிரச்னைகள், தாம்பத்யக் குறைபாடு வரைக்கும் இந்தப் பூச்சிக்கொல்லி மருந்துகளால் பாதிப்பு ஏற்படலாம்.

எங்கள் ஆய்வில் ஒரு பகுதியாக இந்த பாதிப்புகளையும் பட்டியலிட்டிருக்கிறோம். அரசுக்கும், டீ உற்பத்தியாளர்களுக்கும் இதையெல்லாம் எடுத்துச் சொல்லியிருக்கிறோம். குறிப்பாக விவசாயிகளுக்கு, ‘நான்  பெஸ்டிசைட் மேனேஜ்மென்ட்’... அதாவது, பூச்சிக்கொல்லி இல்லாத முறையில் டீ உற்பத்தி செய்ய அறிவுறுத்தியிருக்கிறோம். ஆந்திராவில் இதைத்தான் பின்பற்றி வருகிறார்கள்.’’

இந்த அறிக்கை வெளியானதுமே கிரீன்பீஸ் அமைப்பு மீது வழக்கு போடப் போவதாக தேயிலை சார்ந்த பல அமைப்புகள் கொதித்துள்ளன. ஆனாலும் சில முன்னணி நிறுவனங்கள், ‘பூச்சிக்கொல்லியின் சுவடே இல்லாத டீத்தூளைத் தருவோம்’ என உறுதிமொழி எடுத்திருப்பது ஆறுதலான விஷயம். 

‘‘தேயிலைச் செடி வளரும் பருவமான ஏப்ரலில் எங்களது ஆய்வு கண்டுபிடிப்பைச் சரிபார்த்து திருத்திக்கொள்வதாக அவர்களும் வாக்குறுதி கொடுத்திருக்கிறார்கள். மாற்றம் வரும் என அரசையும் உற்பத்தியாளர்களையும் நம்புவதைத் தவிர நமக்கு வேறு வழியில்லை!’’  நிதர்சனத்தைச் சொல்லி முடிக்கிறார் அஸ்வினி.இதற்கு புளியங்கொட்டை கலப்பட டீயே பரவாயில்லை போலிருக்கிறதே!

முதுமையை தடுத்து இளமை தரும் கொய்யா

பழங்களிலேயே விலை குறைவானதும், அனைவராலும் எளிதில் வாங்கி சாப்பிடக்கூடியது கொய்யாப் பழம். இதில் முக்கிய உயிர் சத்துக்களும், தாது உப்புக்களும் அடங்கியுள்ளன. கொய்யாமரத்தில் இருந்து கிடைக்கக்கூடிய கனி, பட்டை என அனைத்துமே மருத்துவகுணம் கொண்டது. வைட்டமின் பி மற்றும் வைட்டமின் சி ஆகிய உயிர்ச்சத்துகளும், கால்சியம், பாஸ்பரஸ், இரும்பு போன்ற தாது உப்புக்களும் கொய்யா பழத்தில் நிறைந்துள்ளது. கொய்யா மரத்தின் இளம் புதுக்கிளைகளின் மூலம் தயாரிக்கப்படும் கஷாயம் காய்ச்சலைக் கட்டுப்படுத்தும். இம்மரத்தின் பட்டை பாக்டீரியா அழுகலை தடுக்கும். காய்ச்சலைப் போக்கும். வேர்ப்பட்டை குழந்தைகளின் வயிற்றுப்போக்கினை குணப்படுத்தும்.

கொய்யாப்பழத்தை அரிந்து சாப்பிடுவதை விட பழத்தை நன்றாக கழுவிய பிறகு பற்களில் படும்படி நன்றாக மென்று தின்பதே நல்லது. இதன்மூலம் பற்களும், ஈறுகளும் பலப்படும். வேறு எந்தப் பழத்திலும் இல்லாத வைட்டமின் சி என்ற உயிர்ச்சத்து இப்பழத்தில் அதிக அளவில் உள்ளது. எனவே, வளரும் குழந்தைகளுக்கு கொய்யாப்பழம் ஒரு வரப்பிரசாதமாகும். உடல் நன்கு வளரவும், எலும்புகள் பலம் பெறவும் கொய்யாப்பழம் உதவும். கொய்யாவின் தோலில் தான் அதிக சத்துக்கள் உள்ளன. இதனால் தோலுடன் சாப்பிட வேண்டும்.

முகத்திற்கு பொலிவையும், அழகையும் தருகிறது. தோல் வறட்சியை நீக்குகிறது. முதுமை தோற்றத்தை குறைத்து இளமையானவராக மாற்றுகிறது. மதுபோதைக்கு அடிமையான மது பிரியர்கள் அப்பழக்கத்தில் இருந்து விடுபட நினைத்தால் இப்பழத்தை அதிகம் சாப்பிடலாம். இதை தொடர்ந்து சாப்பிட்டால் மது அருந்தும் ஆசை, வெறி எல்லாம் தூள் தூளாகி விடும். மிக எளிதில் மது போதை பழக்கத்தில் இருந்து விடுதலை பெறலாம். உணவு சாப்பிடுவதற்கு முன் இப்பழத்தை சாப்பிடுவது நல்லதல்ல.

சாப்பிட்ட பின்போ அல்லது சாப்பிடுவதற்கு நீண்ட நேரத்திற்கு முன்போ சாப்பிட்டால் நல்லது. நோயால் அவதியுற்று மருந்து சாப்பிட்டு வருபவர்கள் இப்பழத்தை சாப்பிட்டால் மருந்து முறிவு ஏற்படும். இருமல், தோல் தொடர்பான வியாதி உள்ளவர்கள் இப்பழத்தை சாப்பிட்டால் நோய் அதிகமாகும். ஒரு சிலருக்கு மயக்கம் ஏற்படும். வாதநோய், ஆஸ்துமா போன்ற நோய் உள்ளவர்கள் இப்பழத்தை சாப்பிடவே கூடாது. மற்றவர்கள் கொய்யாப்பழத்தை இரவில் சாப்பிடாமல் இருப்பது சிறந்தது. இரவில் சாப்பிட்டால் வயிறு வலி உண்டாகும். கொய்யாவை அளவுடன் சாப்பிடவேண்டும். அளவிற்கதிகமாக சாப்பிட்டால் பித்தம் அதிகரித்து வாந்தி மயக்கம் ஏற்படும்.

ஏலக்காயில் மருத்துவகுணம் ஏராளம்

நெஞ்சில் சளி கட்டிக் கொண்டு மூச்சு விட சிரமப்படுபவர்களும், சளியால் இருமல் வந்து, அடிக்கடி இருமி வயிற்றுவலி வந்தவர்களுக்கும் கூட ஏலக்காய் நல்ல மருந்தாக அமையும். ஏலக்காயை மென்று சாப்பிட்டாலே, குத்திரும்பல், தொடர் இருமல் குறையும். வாய் துர்நாற்றம் ஏற்படுவதற்கும் ஜீரண உறுப்புகளில் ஏற்படும் பிரச்சினை தான் காரணம். எனவே வாய் துர்நாற்றத்தைப் போக்க ஏலக்காயை மென்று சாப்பிட்டு வரலாம். சாப்பிடும் உணவு வகைகளில் சிறிது ஏலக்காயை சேர்த்துக் கொள்வது நல்லது. அதிகமாக சேர்த்துக் கொள்ளக் கூடாது.

இதில் உள்ள வாலட்டைல் என்ற எண்ணெய்தான் நறுமணத்தையும் தந்து நோய்களைக் குணப்படுத்தும் ஆற்றலையும் தனக்குள் கொண்டுள்ளது. இதில் உள்ள காரக்குணம் வயிற்றுப் பொருமலைக் குணமாக்கி எளிதில் செரிமானம் ஆகும்படி தூண்டுகிறது. ஏலக்காயை தேநீர் பாயாசம் முதலியவற்றில் சேர்த்துப் பருகினால் அதில் உள்ள மனம் கவரும் நுண்ணிய பண்பு மன இறுக்கம், படபடப்பு முதலியவற்றை அகற்றி உடனடியாகப் புத்துணர்ச்சி அளிக்கிறது. எனவே காலையில் தேநீர் அல்லது காபியில் ஏலக்காய் சேர்த்து அருந்துவது நல்லது.

ஈரப்பதம், புரதம், மாவுப்பொருள், நார்ச்சத்து மற்றும் கால்சியம், பாஸ்பரஸ், இரும்பு போன்ற முக்கிய தாது உப்புக்களும் கலந்துள்ளன. ஏலக்காய் ஆண்மைக் குறைவு பெண்மைக் குறைவும் நீக்கி குழந்தைப் பாக்கியமும் உண்டாக்கும். இரவு ஒரு சிட்டிகை ஏலக்காய்த்தூளை அடித்தொண்டை அழற்சி தொண்டைக்கட்டு உள்நாக்கில் வலி குளிர்காய்ச்சலால் ஏற்படும் தொண்டைக்கட்டு முதலியவற்றைக் குணப்படுத்த ஏலக்காயும் இலவங்கப்பட்டையும் சேர்த்து கொதிக்க வைத்த தண்ணீரால் கொப்பளித்தால் தொண்டைக்கு இதமாக இருக்கும்.

ஜீரணமாகாதபோது வரும் தலைவலியை ஏலக்காய் சேர்ந்த ஒரு கப் தேநீர் விடுவிக்கும். சில சமயம் வெங்காயம் வெள்ளைப்பூண்டு சேர்த்துக் கொள்பவர்களுக்கு நெஞ்செரிச்சலும் வாய்வுத் தொந்தரவும் இருக்கும். இவர்கள் சாப்பாட்டிற்குப் பிறகு ஏலக்காய் மெல்லுவது நல்லது. இரண்டு ஏலக்காயில் உள்ள விதைகளை இடித்து கிராம்புகள் மல்லித்தூள் சேர்த்து தண்ணீர் கலந்து விழுங்கினாலும் உடல் ஜீரணமாகும். பாலில் சுடவைத்து இத்துடன் ஒரு தேக்கரண்டித் தேனும் சேர்த்து இருபாலரும் தினமும் அருந்தி வந்தால் இருபாலருக்கும் குறைபாடுகள் குணமாகும்.

அதே நேரத்தில் பாலில் அதிகமாக ஏலக்காய்த்தூளைச் சேர்த்தால் மலட்டுத்தன்மை ஆண்மைக்குறைவு அதிகரிக்கும். எனவே ஒரு சிட்டிகை ஏலக்காய்த் தூளையே பயன்படுத்தினால் போதும். இதே போல ஏலக்காயை சூயிங்கம்மிற்கு பதிலாக மென்றால் வயிற்றுப் பசியை அதிகரித்து நன்கு சாப்பிட வைக்கும். நெல்லிக்காய்ச் சாறில் ஒரு சிட்டிகை ஏலக்காய்த் தூளைச் சேர்த்துத் தினம் மூன்று வேளை அருந்தி வந்தால் மேகவெட்டை நோய்க்கு தீர்வு கிடைக்கும். இத்துடன் சிறுநீர்ப்பை சுழற்சியும் சிறுநீர்க் கழிக்கும்போது ஏற்படும் எரிச்சலும் குணமாகும். அடிக்கடி விக்கல் எடுத்தால் ஒரு கப் தண்ணீரில் இரண்டு மூன்று ஏலக்காயைத் தட்டி உள்ளே போடவும். பிறகு புதினாக் கீரையில் 5, 6 இலைகள் மட்டும் இதில் போட்டுக் கொதிக்கவிடவும். பிறகு வடிகட்டி அருந்தினால் விக்கல் எடுப்பது குறையும்.

நறுஞ்சுவையும் நறுமணமும் உள்ள மருந்துப்பொருள் ஏலக்காய். இதன் காரணத்தால் மருந்துத் தயாரிப்பாளர்கள் பலரும் பயன்படுத்தி நோய்கள் விரைந்து குணமாகவும் உடலுறுப்புகளை தூண்டிவிடவும் பயன்படுத்துகின்றனர். குறைந்தபட்சம் தேநீர் பாயசம் முதலியவற்றில் சேர்த்தால் கூட நல்ல சுறுசுறுப்பைப் பெற முடியும். அதோடு ஜீரணக்கோளாறு இல்லாமல் ஆரோக்கியமான உடலையும் பாதுகாப்பாக வைத்துக் கொள்ளலாம். பலர் சூயிங்கம் சாப்பிடுவார்கள். இதனால் எந்த பலனும் இல்லை. ஆனால் அதற்கு பதிலாக ஏலக்காயை வாயில் போட்டு மென்று சாப்பிடலாம். பசி எடுக்கவில்லை. சாப்பிட பிடிக்கவில்லை என்று கூறுபவர்கள், தினமும் ஒரு ஏலக்காயை வாயில் போட்டு மென்றால், பசி எடுக்கும். ஜீரண உறுப்புகள் சீராக இயங்கும்.